Гаран дээрх цусны толбо улааран харагдана. Хичнээн угаасан ч арилахгүй байгаа мэт санагдавч чухам энэ харагдаж буй нь цусны толбо уу эсвэл гараа хэт их үрснээс болж улайсан улайлт уу гэдгийг гайхна. Аль нь ч бай одоо зогсохгүй бол дараагийн бай минь хөлөөр минь л алагдах хэрэг гарах нь дээ. Эцэст нь хангалттай гэж үзээд угаалгын өрөөнөөс гарлаа. Бүх зүйлээ эхнээс нь нэг нягталж үзэх хэрэгтэй. Хорвоогийн хамгийн ухаантай, хичээнгүй бас нямбай хүмүүс бол алуурчид гэдэгт тэр туйлаас их итгэдэг.
Өрөөн доторхыг тойруулан харж цусны толбо, унасан байж болох үс зэргийг сайтар арилгасан эсэхээ нэг бүрчлэн шалгав. Зарим хүмүүс гэрээ цэвэрлэж ажлын стрессээ тайлдагтай адил тэр хийсэн хэргийнхээ ул мөрөө баллахдаа хамгаас дуртай байв. Үүнийг төгс болгохын тулд их олон жилийн судалгаа, туршилт хийсээр ирсэн бөгөөд одоо бол мэргэжилтэн болсон. Өрөөг бүхэлд нь шалгаж дууслаа. Одоо ганц ажил үлдсэн. Цогцсыг булах.. 
Булчин шөрмөс гээд байх зүйл байдаггүй болохоор хүнд зүйл өргөх нь түүнд таалагддаггүй юм. Мөн хүний биеийг ул мөргүй алга болгох гэдэг туйлаас хэцүү. Цус, хурууны хээг арилгах төдийгүй бүр алах нь хүртэл түүнд хавь илүү амархан санагдана. Хичнээн удаан бодож судалгаа хийсэн ч яаж огт ул мөр нотлох баримт үлдээлгүй хийж болох аргыг олохгүй байлаа. Шороонд булах, мөчлөөд хэсэг хэсгээр нь булах, шуудайнд хийгээд гол тэнгис далай руу шидэж орхих гээд олон арга байсан ч үргэлж л шинэ сонин содон зүйлс хүсдэг болохоор эдгээр аргууд хэтэрхий энгийн санагдаж санаанд үл нийцнэ. 
 
Бас нэг арга мухардаж байсан зүйл нь тэр цус харж чаддаггүй байв. Алуурчин хэрнээ цус харахаар зүрх нь үхдэг гэж бодохоор заримдаа өөрт нь ч хөгтэй санагддаг л юм. Энэ айдас нь ганц цогцсыг алга болгоход бус хамгийн чухал ажил болох аллага үйлдэхэд нь ч саад болох байлаа. Ер нь л алуурчин болохоор шийдсэн эхний мөчөөс л хамгийн том асуудал нь болов. Үүнийг шийдэхийн тулд өөрийгөө олон ч удаа зүсэж цусанд дасахыг хичээсэн авч хурууны үзүүрээс дусал цус гарахтай зэрэгцэн толгой нь эргэж газар дээр ухаан орно. Нилээд оролдсоны эцэст цусанд дасаж чадахгүйтэйгээ эвлэрэх үед гэнэт толгойд нь уншиж байсан зохиолын хэсэг нь санаанд оржээ. Нэгэн япон зохиолчийн цуврал ном байсан санагдана. Эхний бүлгээс хойш уншаагүй тул номны нэрийг нь ч санахгүй байсан ч уншсан тэр хэдэн хуудас л түүний  мухардлыг тайлахад хангалттай байлаа. Уг номон дээр гардаг нэгэн алуурчин эмэгтэй хүний хүзүүний хойно байдаг нэгэн цэгрүү маш нарийн уян зүүгээр хатгаж амийг нь бүрэлгэдэг талаар гардаг юм. Үүнийг бодож олсон шөнөдөө хэтэрхий догдолсондоо унтаж чадалгүй хоносоор нар мандахдаа зэрэгцэн босож номын сан руу явжээ.

➻➻➻

➻➻➻